Paytaxtın Xətai rayonunda sakinləri narahat edən problem avtobus dayanacağının məişət tullantılarının atıldığı qutularla eyni məkanda yerləşməsidir. Bu haqda ATV Xəbər 27 iyun tarixində reportaj hazırlayıb.
Xətai rayonu, İlqar Zülfüqarov küçəsində yerləşən dayanacağın yanında məişət tullantılarının atılması üçün qutular da yerləşdirilib. Sərnişinlər isə avtobus gözləyərkən burada həm antisanitar vəziyyətlə, həm də pis qoxu ilə üz-üzə qalırlar.
Sakinlər deyir ki, uzun müddətdir ki, məsələ həll olunmur. Çəkiliş zamanı mənzil-kommunal və istismar sahəsinin işçiləri ünvana yaxınlaşaraq təmizlik işləri gördülər. Əməkdaşlar bildirdilər ki, təmizliyə və burada yerləşən qutulara mümkün qədər nəzarət edilir.
Xətai rayon İcra Hakimiyyətindən bildirildi ki, zibil qutularının yerləşdirilməsi müvafiq şərtlərlə həyata keçirilir. Sözügedən ünvanda isə qutular dayanacaq təyin edilməmişdən öncə qurulub.
Qurumun mətbuat katibi Pənah İmanov, həmçinin qeyd edib ki, zibil qutularının olmasına baxmayaraq, Bakı Nəqliyyat Agentliyinin (BNA) əməkdaşları orada dayanma nişanı vurublar.
BNA-nın mətbuat xidmətindən bildirildi ki, əməkdaşlar hadisə yerinə gəlib vəziyyəti araşdıracaqlar.
