Bakının Bayıl yaşayış massivi, İbrahim Məmmədov küçəsində yerləşən baxımsız parkda yenidənqurma və bərpa işlərinə başlanılıb. Bu haqda bu gün, 27 iyul tarixində Bakuplus.az Səbail Rayon İcra Hakimiyyətinin mətbuat xidmətinə istinadən məlumat verir.
Aparılan yenidənqurma işləri çərçivəsində ümumi sahəsi 2 ha olan parkda yeni tamet-daş üzlükləri düzülür, burada olan istifadəyə yararsız söhbətgah sökülərək yenisi ilə əvəz olunur, yeni dəmir-beton dirəklər çəkilir, fasad divarı təmir edilir. Eyni zamanda parkın ərazisini işıqlandırmaq üçün 20 işıq dirəyi, eləcə də idman qurğuları və uşaq meydançasının quraşdırılması nəzərdə tutulur.
Müasir tələblərə uyğun inşa olunan parkda yeni qazon salınacaq, həmişəyaşıl ağac və gül kolları əkililəcək, parkın ətrafında mövcud asfalt örtüyü yenilənəcək və işıqlandırma sistemləri quraşdırılacaq. Yenidənqurma işlərinin bu ilin 3-cü rübündə başa çatdırılması planlaşdırılır.
