Qardaş ölkə Türkiyədə baş verən güclü zəlzələdən zərər çəkmiş insanlara yardım aksiyasına ölkənin ən böyük topdansatış bazarlarından biri olan “Sədərək” ticarət mərkəzi də qoşulub. Bu haqda bu gün, 10 fevral tarixində Qafqaz TV məlumat verib.
Hadisə baş verən gündən Sədərək TM-in rəhbərliyi tərəfindən xüsusi qərargah yaradılıb. Artıq bir neçə gündür ki, “Sədərək”in rəhbərliyi və burada çalışan sahibkarlar könüllülük əsasında işləyir, humanitar yardım yığırlar.
Türkiyə üçün çarpayılar, uşaq, qadın və kişi üçün isti geyim, ayaqqabılar yığılıb. Bu günə kimi Türkiyəyə 3 yük maşını göndərilib. Humanitar yardımın toplanması davam edir.
Təbii fəlakətin ilk günündən “Sədərək” ticarət mərkəzinin rəhbərliyi Türkiyənin Azərbaycandakı səfirliyi ilə əlaqə yaradıb və bütün bu yardımlar səfirliklə koordinasiyalı şəkildə onların təqdim etdiyi ehtiyac siyahısına uyğun olaraq hazırlanır.
