Azərbaycanda orta və yaşlı əhalinin profilaktikası məqsədilə vaksinasiyası üçün peyvənd (Qızılca-Parotit-Məxmərək) tətbiq olunacaq. Bu haqda bu gün, 28 noyabr tarixində Bakuplus.az Səhiyyə Nazirliyinə istinadən məlumat verir.
Nazirlikdən bildirilib ki, hazırda ölkədə 284 nəfər qızılcaya yoluxub. Həmsərhəd ölkələrdən 2023-cü ilin aprel ayından başlayaraq gətirilmə qızılca hadisələri ilə əlaqəli olaraq əhali arasında xəstəliyin yayılması müşahidə olunur. Yoluxanların əksəriyyəti peyvənd olunmamış uşaqlardır.
Bu səbəbdən yaşa görə peyvəndlərdən kənarda qalan uşaqların aktiv şəkildə müəyyən edilməsinə və təxirəsalınmaz peyvəndlərə cəlb olunmasına nəzarət gücləndirilib.
Yoluxma ocaqlarında epidemiyaya qarşı tədbirlər həyata keçirilir, xəstələrlə təmasda olan şəxslər müəyyən edilir, 21 günlük müşahidə aparılır.
Bununla yanaşı, epidemioloji vəziyyəti nəzərə alaraq, ölkə ərazisində orta və yaşlı əhalinin profilaktikası məqsədilə vaksinasiyası üçün peyvənd (Qızılca-Parotit-Məxmərək) tətbiq olunacaq.
