“28 May” metro stansiyası yaxınlığından “Həzi Aslanov” stansiyası istiqamətində hərəkət edən “Bakubus” MMC-yə məxsus 11 nömrəli marşrut xətti üzrə hərəkət edən nəqliyyat vasitələrindən sərnişinlər şikayət edirlər. Bu avtobusların pik saatlarda çox gec hərəkət etdiyi bildirilir. Bu barədə Xəzər Xəbər TV reportaj hazırlayıb.
Bir müddət əvvəl 11 saylı marşrut xətti üzrə köhnə avtobuslar “Bakubus”la əvəzlənib. Əvvəllər sərnişinlər buna sevinirdilərsə, indi marşrutun fəaliyyətindən narazıdırlar. Köhnə avtobuslar 4-5 dəqiqə fərqlə gedirdisə, indi sərnişinlər 40 dəqiqəyə qədər avtobus gözləməli olurlar.
Bəzi hallarda avtobusların gecikməsi sərnişinlərlə sürücülər arasında mübahisələrə də səbəb olur. Bundan əlavə, avtobuslar təbii olaraq həddindən artıq yüklənir, bu da pandemiya zamanı çox təhlükəlidir.
Bakı Nəqliyyat Agentliyinin mətbuat katibi Mais Ağayevin verdiyi məlumata görə, 11 nömrəli marşrut xətti üzrə interval mərkəzi dispetçer xidməti tərəfindən real vaxt rejimində izlənilir. Onun sözlərinə görə, əsas problem şəhərin 4 rayonundan keçən marşrut xətti üzrə ictimai nəqliyyat üçün xüsusi zolaqların üzərində digər avtomobillərin hərəkət etməsidir. Bir çox sürücülər qaydaları pozaraq bu zolaqlarda tıxac yaradırlar. Nəticədə avtobusların işində ləngimə yaranır.
Lakin sərnişinlər bu cavabı məqbul hesab etmirlər. Sübut kimi son dayanacaqda düzülmüş onlarla avtobusu göstərirlər.
