Baş nazirin sabiq müavini vəfat edib. Bu haqda bu gün, 16 dekabr tarixində Bakuplus.az Oxu.az-a istinadən xəbər verir.
Ədəbiyyatşünas, türkoloq, filologiya elmləri doktoru Kamil Vəli Nərimanoğlu 77 yaşında dünyasını dəyişib.
Mərhum Bakı Dövlət Universitetinin Azərbaycan dilçiliyi kafedrasına rəhbərlik edib, Böyük Elmi Şuranın üzvü olub. O, Səlcuq Universitetinin fəxri doktoru adını alıb. Həmçinin Türkiyə Linqvistika Cəmiyyətinin müxbir üzvü idi. Nərimanoğlu Türkiyənin Ege Universitetində, Şimali Kiprin Şərqi Akdəniz Universitetində dərs deyib. Türk Dil Qurumunun, Atatürk Kültür Mərkəzinin və Türk Folklor Qurumunun fəxri üzvü, Səlcuq Universitetinin fəxri professoru olub.
O, 1993-cü ildə Azərbaycan Respublikası Baş nazirinin müavini vəzifəsində işləyib.
Kamil Vəli Nərimanoğlu Türkiyənin “Şərəf və Ləyaqət nişanı” ilə təltif edilib, Türkiyə Nazirlər Kabineti yanında Türk Əməkdaşlıq və İnkişaf Agentliyinin, Türk Dil Qurumunun mükafatlarını alıb.
Həmçinin Bilkənd Universiteti və Türk Mədəniyyətinə Xidmət Vəqfi tərəfindən dünyaca məşhur 4 elm və mədəniyyət xadimi ilə birgə mükafatlandırılmışdı. Həmin il Qırğızıstanda Çingiz Aytmatov Akademiyasının fəxri üzvü seçilmişdi.
Ədəbiyyatşünas oxucular arasında “Elin yaddaşı, dilin yaddaşı” əsəri ilə tanınıb.
