Bakının Sabunçu rayonu, Bakıxanov qəsəbəsi, E.Mehdiyev küçəsi, 6 ünvanında yerləşən mebel istehsalı sexində nöqsanlar aşkarlanıb. Bu haqda bu gün, 24 may tarixində Bakuplus.az Fövqəladə Hallar Nazirliyinə (FHN) istinadən xəbər verir.
Adil Hüseynova məxsus istehsalat sexində keçirilən yoxlama zamanı yanğın təhlükəsizliyi sahəsində qayda pozuntuları olduğu məlum olub.
Aşkar olunan nöqsanlar aşağıdakı kimidir:
Obyekt avtomatik yanğınxəbərverici siqnalizasiya qurğusu və ilkin yanğınsöndürən vasitələrlə təchiz edilməyib;
Obyektdə mövcud odsöndürən balonların tərkibi dəyişdirilərək yenisi ilə əvəzlənməyib;
Elektrik təsərrüfatı “Elektrik Qurğularının Quraşdırılması Qaydası”nın tələblərinə uyğun quraşdırılmayıb və elektrik təsərrüfatına profilaktik baxış keçirilməyib;
Obyektdə istifadə olunan elektrik avadanlıqları artıq yüklənmədən və qısaqapanmadan mühafizə məqsədilə qoruyucu aparatlarla təmin edilməyib;
Obyektdə izolyasiyası zədələnmiş və nasaz elektrik avadanlıqlarından istifadə olunur.
Adıçəkilən nöqsanlar nəzərə alınaraq, istehsalat sexinin fəaliyyəti dayandırılıb.
