Sabunçu Rayon Dövlət Yol Polisi Şöbəsinin əməkdaşları ərazidə yaranmış nəqliyyatın xaotik hərəkəti, tıxacları və avtomobillərin sıxlığını tam nəzarətə götürüblər. Nəticədə nəqliyyatın hərəkəti rahat və təhlükəsiz olub, sıxlıq və tıxaclar aradan qaldırılıb. Bu haqda bu gün, 1 dekabr tarixində Avtosfer məlumat verib.
Rayon sakini Kəmalə İbrahimova müvafiq fotoları sosial şəbəkədə paylaşıb. O bildirib ki, son 15-16 ildə Sabunçuda belə rahatlıq görməyib: “Hər kimin təklifi, fəaliyyətidirsə, təşəkkür edirəm”.
Nəzarət edilən ərazilərdən biri Sabunçu dəmir yolu stansiyası və bazarın qarşısıdır. Digər ərazilərdə də tıxac yaradan avtobusların ikinci zolaqda və ya dayanacaqdan kənarda dayanmasına icazə verilməyib, taksilərin yolları və dayanacaqları tutması qadağan edilib.
Bəzən sərnişinlərin avtobuslara minməməsi, yolun ikinci və ya üçüncü zolaqlarına çıxaraq manatlıq taksilərə üz tutmaları səbəbindən sıxlıq və tıxac yaranır. Belə halların qarşısını almaq üçün Sabunçu Rayon Polis İdarəsinin və DYP şöbəsinin əməkdaşları pik saatlarda yollarda xidmətə cəlb olunurlar.
