Sabah, avqustun 8-də saat 11:00-da Bakı şəhəri üzrə bütün bağçalarda növbələrin yaradılması prosesinə start veriləcək. Bu haqda bu gün, 7 avqust tarixində Bakuplus.az Elm və Təhsil Nazirliyinə istinadən məlumat verir.
Bağçalara qəbul sistemində növbə yaradılarkən bir uşaq üçün maksimum 3 məktəbəqədər təhsil müəssisəsi seçmək mümkündür. Mövcud növbələrin ərizələrə çevrilməsi prosesi, mövcudluqdan asılı olaraq, minimum 5 gündən sonra həyata keçiriləcək. Növbə sorğuya çevrildikdən sonra valideyn (və ya qanuni qəyyum) 15 gün ərzində müvafiq quruma müraciət etməlidir, əks halda sorğu silinəcək və növbəyə başqa uşaq qoyulacaq.
Qəbulla əlaqədar sentyabrın 1-dən sentyabrın 15-dək elektron qəbul sistemi müvəqqəti olaraq dayandırılacaq. Proses başa çatdıqdan sonra məktəbəqədər təhsil müəssisələrində boş qalan yerlərə uşaqların qəbulu ilboyu davam etdiriləcək.
Bildirilib ki, ötən tədris ilində qəbul sistemində yaradılan növbələr və ərizələr arxivləşdirilərək valideyn qəbuluna əlavə edilib. Həmin növbələr və sorğular bu il etibarsızdır.
