Binəqədi Rayon Məhkəməsində 14 yaşına çatmış, lakin 16 yaşına çatmayan şəxsə qarşı seksual xarakterli hərəkətlər etmədə təqsirləndirilən Kərim Kərimovun (adı və soyadı şərtidir) cinayət işi üzrə məhkəmə istintaqı yekunlaşıb.
Hakim Aytəkin İbrahimovanın sədrliyi ilə keçirilən prosesdə hökm oxunub.
Məhkəmənin hökmü ilə Kərim Kərimova 2 il müddətə azadlıqdan məhrumetmə cəzası təyin olunub.
İttihama görə, 1997-ci il təvəllüdlü Kərim Kərimov 14 yaşına çatmış, lakin 16 yaşına çatmayan - 2010-cu il təvəllüdlü S.S.-ni qaçırıb.
Belə ki, o, 2026-cı il yanvarın 31-də saat 9 radələrində Bakı şəhəri Binəqədi rayonu ərazisində "Snapchat" sosial şəbəkəsi vasitəsilə tanış olduğu S.S.-ni istəyi ilə qaçıraraq əmisinin evinə aparıb.
Kərim Kərimov məhkəmədə ifadəsində bildirib ki, S.S.-nin anasının xahişi ilə qaçırdığı qızı geri - evlərinə qaytarıb:
"Mən S.S. ilə bağlı öz valideynlərimə məlumat verdim. Lakin onlar razı olmadılar. Mənə ilk nikahımdan boşanmadığımı dedilər".
Zərərçəkmiş S.S. məhkəmədə bildirib ki, Kərimlə 2025-ci il dekabrın 12-də sosial şəbəkə vasitəsilə tanış olub. Kərim əvvəlcə subay olduğunu desə də, sonradan evli olduğunu və boşanmaq üzrə olduğunu bildirib. S.S. ayrılmaq istəsə də, Kərim ondan ayrılmamasını və onu "gözəl yaşadacağını" deyib.
mənbə: oxu.az
