Ramana sakinləri 162 nömrəli avtobusun fəaliyyətindən narazıdırlar.
Bakuplus.az-a müraciət edən sakinlərin sözlərinə görə, "Xaliq Faiqoğlu" şirkətinin xidmət göstərdiyi 162 nömrəli marşrut xəttində avtobusların sayı və intervalı ilə bağlı ciddi problem yaşanır.
Sakinlər bildirirlər ki, Ramana qəsəbəsində, xüsusilə sosial binaların yerləşdiyi ərazidə cəmi bir neçə avtobusun işləməsi sərnişinlərin uzun müddət dayanacaqda gözləməsinə səbəb olur. Onların sözlərinə görə, avtobus gözləmə müddəti hər gün 30 dəqiqədən çox olur.
Vətəndaşlar məsələ ilə bağlı dəfələrlə şikayət etdiklərini, lakin problemin həll olunmadığını deyirlər.
Sakinlərin fikrincə, xəttə ən azı 7-8 normal vəziyyətdə olan avtobus buraxılmalı və nəqliyyat vasitələri müəyyən edilmiş normal intervalla hərəkət etməlidir.
Onlar aidiyyəti qurumlardan, o cümlədən Azərbaycan Yerüstü Nəqliyyat Agentliyindən (AYNA) problemin həllinə diqqət yetirməyi tələb edirlər.
