Sahibkar qadının övladları onun borclarını ödəməyə məcbur olublar. Bu haqda bu gün, 9 dekabr tarixində Bakuplus.az APA-ya istinadən xəbər verir.
Elmira Şirinovanın sahibi olduğu ''Bulaq-2'' MTK 2019-cu ildə 1 mənzili 2-3 nəfərə sataraq dələduzluq edib. Ona külli miqdarda pul verib ev almaq istəyən şəxslər nə mənzillərini əldə edə, nə də pullarını geri ala biliblər.
Sahibkar barəsində 3 maddə üzrə cinayət işi açılıb. Ancaq məhkəmə prosesi zamanı Elmira Şirinova vəfat edib. Məhkəmə mərhum sahibkarın vurduğu zərəri ödəməli olduğu barədə qərar verib. Buna görə də onun övladlarına məxsus bütün əmlaklar müsadirə edilib.
“Bizim çıxarışla əlimizdə olan evlərimiz, obyektlərimiz hamısı müsadirə edilib. 2 körpə uşaqla ananı çölə atıblar, kirayədə qalır. Yeni il qabağı biz hara gedək?!” – deyə sahibkarın qızı qeyd edib.
Hüquqşünas Şamil Paşayev məsələ ilə bağlı bildirib ki, əgər əmlak cinayət yolu ilə alınıbsa, bu zaman əmlaka həbs qoyula bilər, ancaq əmlak öz şəxsi hesabına əldə edilibsə, bu zaman onların müsadirə edilməsi qanuni deyil.
