Hər gün minlərlə insan Bakı şəhərinə işləmək, təhsil almaq və müxtəlif şəxsi məqsədlərlə səfər edir. Bu da paytaxta doğru olan nəqliyyat axınını xeyli artırır. Son illər şəxsi avtomobillərlə hərəkətin çətinləşməsi, tıxacların artması səbəbindən vətəndaşlar ictimai nəqliyyata, xüsusilə avtobuslara daha çox üstünlük verməyə başlayıb.
Həmçinin avtobus zolaqlarının yaradılması da insanların avtobuslara üz tutmasının əsas səbəblərindəndir. Belə ki, bu zolaqlarda avtobuslar daha sürətli hərəkət edə bilir, bu isə insanların ünvana daha tez və vaxtında çatmasına şərait yaradır. Eyni zamanda, avtobusla səyahət şəxsi avtomobillə müqayisədə həm daha sərfəlidir, həm də daha təhlükəsiz hesab olunur.
Sərnişin tələbatını nəzərə alan Azərbaycan Yerüstü Nəqliyyat Agentliyi (AYNA) tərəfindən Ceyranbatan və Sumqayıt istiqamətlərindən paytaxt istiqamətində bir sıra yeni avtobus marşrutları xəttə buraxılıb.
AYNA-nın mətbuat katibi Tural Orucov, sözügedən avtobuslarla bağlı milli.аz-ın sorğusuna cavab olaraq ətraflı məlumat verib.
Qeyd edib ki, Sumqayıtdan Bakı şəhəri istiqamətinə Ceyranbatan qəsəbəsindən keçməklə 502, 509, 594 və 595 nömrəli marşrut xətləri fəaliyyət göstərir.
Eyni zamanda Ceyranbatan qəsəbəsini "Abşeron" ticarət mərkəzi ilə əlaqələndirən və "Xocəsən" metrostansiyasından keçən 505 nömrəli avtobus sərnişindaşıma xidməti təqdim edir.
H.Z.Tağıyev qəsəbəsi - Bakı Beynəlxalq Avtovağzal Kompleksi istiqaməti üzrə hərəkət edən 502 nömrəli marşrut, Sumqayıt şəhəri - "Binə" ticarət mərkəzi marşrutu üzrə fəaliyyət göstərən 509 nömrəli marşrut sərnişinlərə xidmət göstərir.
Paytaxt istiqamətinə ictimai nəqliyyatın təşkili ilə bağlı sərnişin tələbatı nəzərə alınaraq AYNA tərəfindən Sumqayıt şəhər Avtovağzalını Bakı Beynəlxalq Avtovağzal Kompleksi ilə əlaqələndirən 595 və Sumqayıt şəhər avtovağzalını metronun "20 Yanvar" stansiyası əlaqələndirən 594 nömrəli ekspres marşrut xətləri də təşkil edilib.
Vətəndaşların müraciətləri nəzərə alınaraq, Saray qəsəbə sakinlərinin ictimai nəqliyyata tələbatını təmin etmək üçün 508 nömrəli marşrut istifadəyə verilib. Marşrut Saray qəsəbəsini metronun "20 Yanvar" stansiyası ilə əlaqələndirir.
Noyabrın 1-dən Sumqayıt şəhəri və Saray qəsəbəsini Bakı Beynəlxalq Avtovağzal Kompleksi ilə əlaqələndirən 503 nömrəli müntəzəm marşrutun hərəkət sxemi dəyişdirilib. Belə ki, sərnişin axını nəzərə alınaraq 503 nömrəli marşrut avtobusları Sumqayıt şəhərini metronun "20 Yanvar" stansiyası ilə əlaqələndirir.
Sumqayıt şəhərindən paytaxta böyük sərnişin axını nəzərə alınaraq, həmçinin vətəndaşların metronun "20 Yanvar" stansiyası istiqamətində sürətli və rahat gedişlərini təmin etmək məqsədilə noyabrın 12-dən AYNA tərəfindən 500 nömrəli müntəzəm avtobus marşrutu təşkil edilib. Marşrut üzrə ekoloji cəhətdən təmiz, 18 metrlik böyüktutumlu avtobuslar sərnişinlərə xidmət göstərir.
Başlanğıcını Sumqayıt şəhərinin Zülfü Hacıyev küçəsindən (Heydər Əliyev Parkı) götürən hər iki marşrutun (500 və 503) son dayanacaq məntəqəsi paytaxtın Seyid Cəfər Pişəvəri küçəsidir.
Eyni zamanda, Sumqayıt şəhərinin Sülh küçəsini metronun "Azadlıq prospekti" stansiyası ilə əlaqələndirən 123 nömrəli marşrut da fəaliyyət göstərir.
