Son günlər regionlarda quzu və mal ətinin qiymətləri artıb.
Bakuplus.az Bizim.Media-ya istinadən xəbər verir ki, hazırda bölgələrdə mal əti kiloqramı 14-15, quzu əti isə 20 manata satılır. Əvvəllər mal əti 12, quzu əti isə 16-17 manata idi.
Bahalaşmanın səbəblərini Liberal İqtisadçılar Mərkəzinin sədri Akif Nəsirli izah edib. O, Bizim.Media-ya açıqlamasında ətin qiymətinin artmasının gözlənilən olduğunu bildirib:
“Yay aylarında ətin qiyməti adətən düşürdü, amma ötən ildən bu ənənə pozulub. Yayda belə ət bahalaşır. Bunun bir neçə səbəbi var. Birincisi, ümumi istehsalın azalmasıdır. Heyvandarlıq sahəsində tənəzzül yaşanır. İkincisi, məhsulun maya dəyərinin artmasıdır. Məsələn, ötən ilin bu dövründə yonca 3 manat idi, indi isə 7 manata satılır. Örüş yerlərinin olmaması səbəbindən fermerlər heyvanları qapalı şəraitdə saxlayır ki, bu da məhsulun maya dəyərini artırır.
Bu səbəblərlə, həm quzu, həm də mal ətinin qiymətləri daha da artacaq. Toyların yaxınlaşması ilə ətə olan tələbatın daha da artması gözlənilir.”
