Türkiyə Respublikası Ali Məhkəməsinin Baş prokuroru Azərbaycana səfər edib.
APA xəbər verir ki, Beynəlxalq Prokurorlar Assosiasiyasının paytaxtda keçirilən 29-cu İllik Konfransı çərçivəsində baş prokuror Kamran Əliyev Türkiyənin Baş prokuroru Muhsin Şentürklə görüşüb. Kamran Əliyev Azərbaycan-Türkiyə dostluğunun xalqların ortaq dəyərlərindən qaynaqlandığını vurğulayıb. O, iki ölkə arasındakı strateji əməkdaşlığın möhkəmləndiyini qeyd edib.
Kamran Əliyev Türk Dövlətləri Təşkilatı çərçivəsindəki əməkdaşlığın cinayətkarlığa qarşı mübarizəyə mühüm töhfə verdiyini bildirib. BMT-nin İqlim Dəyişikliyi üzrə COP29 sessiyasının ölkəmizdə keçirilməsinin əhəmiyyətini vurğulayaraq, noyabrın 15-də “Gücləndirilmiş İqlim Fəaliyyəti üçün Hüquq-mühafizə orqanlarının səfərbər edilməsi” adlı plenar iclasın təşkil ediləcəyini açıqlayıb.
Türkiyə prokurorluq orqanları ilə əlaqələrin əhəmiyyətini qeyd edən Kamran Əliyev, təcrübə mübadiləsinin vacibliyini vurğulayıb. Türk Baş prokuroru, səmimi qəbula görə minnətdarlığını bildirərək, dostluq münasibətlərinin inkişaf edəcəyinə inandığını ifadə edib. Görüşdə Türkiyənin Azərbaycandakı səfiri Cahit Bağçı da iştirak edib. Nümayəndə heyətinin işgüzar səfəri davam edir.
