Son zamanlar bəzi taksi sürücüləri yeni dələduzluğa əl atırlar. Onlar məkana çatmadan proqrama ünvanda olduqları barədə bildiriş göndərirlər. Daha sonra gözləyən sərnişini sifarişi ləğv etməyə məcbur edirlər. Bu zaman bank kartları ilə edilən ödənişlər sərnişinin hesabından silinir. Bu haqda bu gün, 11 yanvar tarixində Bakuplus.az Xəzər Xəbər-ə istinadən məlumat verir.
Sosial şəbəkələrdə bu tip taksi fırıldaqlarının qurbanı olduqlarını iddia edənlər az deyil. Oxşar vəziyyətlə üzləşənlərdən biri də paytaxt sakini Nicat İbrahimovdur. Onun sözlərinə görə, o, taksi sifariş edib və pul hələ ünvana gedənə qədər kartından silinib.
İbrahimovun sözlərinə görə, bu, birinci dəfə deyil. Yaşadığı problemlə bağlı dəfələrlə taksi şirkətləri ilə əlaqə saxlamasına baxmayaraq, vəziyyət dəyişməz qalıb, dəymiş ziyan ödənilməyib.
Taksi sürücüləri problemin əsas səbəbinin kartla ödəniş olduğunu bildiriblər. Çünki əksər taksi sürücüləri bu ödəniş növünü bəyənmirlər.
Yol hərəkəti qaydaları üzrə ekspert Yasin Mustafayev deyir ki, belə faktlarla üzləşən sərnişinlər Azərbaycan Yerüstü Nəqliyyat Agentliyinə (AYNA) müraciət etməlidirlər. Agentlik daxil olan müraciət əsasında həmin şirkətlərin Azərbaycandakı nümayəndəliyinə də ciddi xəbərdarlıq etməlidir.
