Xırdalan şəhərində 26 yaşlı oğlan bacısının keçmiş ərinə xəsarət yetirməkdə ittiham olunub.
Goranboy rayon sakini, 2000-ci il təvəllüdlü Cəlal bacısının keçmiş əri Vəfadarın (adlar şərtidir) bacısından ayrılmasına aydınlıq gətirmək məqsədi ilə onun "TikTok" hesabına qız adı ilə yazıb, onunla əlaqə saxlayıb.
İstintaq sənədlərinə görə, Cəlal Vəfadarı Xırdalanda kirayədə yaşadığı mənzilə dəvət edib. Vəfadar evə girən kimi dəmir parçası ilə onu döyüb, sonra bıçaqlamağa cəhd göstərsə də, niyyətinə tam nail ola bilməyib.
Cəlalın barəsində Cinayət Məcəlləsinin 128-ci maddəsi ilə ittiham elan edilib.
İş üzrə izahat verən Cəlal ona elan olunmuş ittiham üzrə özünü təqsirli bilib.
Abşeron Rayon Məhkəməsinin hökmü ilə Cəlal 7 ay 26 gün müddətinə azadlığın məhdudlaşdırılması cəzasına məhkum edilib.
Hökmə əsasən, ona cəza müddətində Goranboy rayonundan kənara çıxmaq, hər gün saat 21:00-dan 07:00-dək yaşayış yerini tərk etmək qadağan olunub. Cəlala elektron nəzarət vasitəsini daşımaq və işlək vəziyyətdə saxlamaq, həmçinin məhkəmə qərarı olmadan yaşayış yerini dəyişməmək və iş dəyişikliyi barədə nəzarət orqanına əvvəlcədən məlumat vermək öhdəliyi qoyulub. Xəstəxanada müalicə aldığı hallar istisna təşkil edir.
Mənbə: demokrat.аz
