“Toplum TV”nin ofisində araşdırma aparılıb. Bu haqda bu gün, 9 mart tarixində Bakuplus.az APA-ya istinadən xəbər verir.
Keçirilən axtarışlar zamanı məlum olub ki, “Toplum TV” üzərindən 500.000 ABŞ dollarından çox vəsait müxtəlif layihələrin, tədbirlərin və fəaliyyətlərin maliyyələşdirilməsi həyata keçirilib. Maliyyə əməliyyatları Gürcüstandan həyata keçirilib.
Qərbin layihəsi sayılan “Toplum TV” vasitəsilə ölkə ərazisində sosial, ictimai, siyasi istiqamətlər üzrə cəmiyyətdə narazılığın artırılması, itaətsizlik mühitinin formalaşdırılması, gərginliyin yaradılması və inkişaf etdirilməsinə cəhd olunub.
Prosesə bilavasitə nəzarət ABŞ-nin müəyyən qurumları və ayrı-ayrı institutları tərəfindən həyata keçirilib.
ABŞ tərəfindən Azərbaycanda analoji fəaliyyətin təşkil edilməsi və idarə olunması 1990-cı illərin sonlarından başlayıb. Yaradılan şəbəkəyə yerlərdə rəhbərlik edən şəxslərin bu prosesdə fəal iştirakı, eləcə də məsələnin mahiyyəti barədə xəbəri olmayan gəncləri öz dövlətinə qarşı fəaliyyətə cəlb etmələri müəyyən edilib.
Rəhbərlərdən biri sayılan Demokratik Təşəbbüslər İnstitutunun rəhbəri Akif Qurbanov, “Toplum TV”nin rəhbəri Xədicə İsmayıl və digər şəxslər də Qərb fondlarından yüz minlərlə ABŞ dolları alıblar, gənclərə isə çox az məbləğdə vəsait veriblər.
