31 nömrəli məktəbin yanında, Yasamal rayonu, Cabbar Qaryağdıoğlu (keçmiş Sereteli) küçəsindəki həyət təxminən 150 il əvvəl tikilib. Zamanla evlər bölünüb, daxmalar köhnəlib, tavanlar və döşəmələr çürüyüb. Sovet dövründə bu ərazi söküntü planına salınsa da, SSRİ dağıldıqdan sonra proses yarımçıq qalıb.
Sonrakı illərdə ərazi işbazlara satılıb. Sakinlərə bildirilib ki, evlər “П” formasında söküləcək. Amma nəticədə “Г” formasında söküntü aparılıb – bir tərəfdə göydələnlər tikilib, digər tərəfdə isə illərdir heç bir dəyişiklik edilməyib. İnsanlara nə təzminat təklif olunub, nə də alternativ yaşayış yeri verilib.
Ən dəhşətlisi isə budur: burada yaşayan uşaqlar hər gün təhlükə ilə qarşılaşır. Köhnə daxmalar uçmaq üzrədir. Valideynlər daxmaların içinə müvəqqəti dayaqlar qoymaqla uşaqları qorumağa çalışırlar. Amma bu tədbirlər çox zəif və keçicidir – faciə hər an baş verə bilər!
Daha bir təhlükə: bu yararsız daxmalarda artıq siçovullar peyda olub. Bu isə infeksiya və yoluxucu xəstəliklərin yayılma riskini ciddi şəkildə artırır. Uşaqlar təkcə dağıntıların deyil, həm də xəstəliklərin hədəfindədir.
Vaxtilə 31 nömrəli məktəbin də ətrafında uşaqlar üçün təhlükəsiz və sağlam mühit yaradılacağı vəd olunmuşdu. Amma evlər sökülmədiyi üçün nə vəd yerinə yetirilib, nə də bu ailələrin səsi eşidilib. Bir müddət əvvəl saytlar, eyni zamanda Xəzər TV bu mövzunu işıqlandırıb. Aidiyyəti qurumlar araşdırma aparacaqlarını desələr də, hələ də heç bir real addım atılmayıb. Nə çəkilişdən əvvəl, nə də sonra bir nəfər də olsun vəziyyətlə maraqlanmayıb.
Görən bu evlər nə vaxt söküləcək? Bu uşaqların taleyinə kim cavabdeh olacaq?
Kamran Rza
