Bakı sakini viza almaq adı altında dələduzluğun qurbanı olduğunu iddia edib.
Bakuplus.az-a müraciət edən şikayətçi Azər Rüstəmov bildirib ki, ötən ilin may ayında ailə üzvlərinin Almaniyaya getməsi üçün viza sənədlərinin hazırlanması məqsədilə Murad Fikrət oğlu Muradova müraciət edib. Həmin dövrdə Almaniyada yaşayan A.Rüstəmov həyat yoldaşı və oğlunun onun yanına getməsi üçün viza prosesinin təşkil olunmasını istəyib.
Şikayətçinin sözlərinə görə, Murad Muradov məsələni qısa müddətdə həll edəcəyini vəd edərək, mərhələli şəkildə ondan ümumilikdə 4000 manat məbləğində pul alıb.
Lakin iddiaya əsasən, üzərindən təxminən 7 aya yaxın vaxt keçməsinə baxmayaraq, nə viza rəsmiləşdirilib, nə də ödənilən vəsait geri qaytarılıb.
Azər Rüstəmov qeyd edib ki, pulu alan şəxs əvvəlcə müxtəlif bəhanələrlə prosesi uzadıb, son günlərdə isə ümumiyyətlə zəng və mesajlara cavab vermir.
Şikayətçi məsələ ilə bağlı hüquq-mühafizə orqanlarına müraciət edəcəyini bildirib.
O, həmçinin Murad Muradovla "WhatsApp" yazışmalarını və ona göndərdiyi pulların çeklərini redaksiyamıza təqdim edib.
Qeyd edək ki, son dövrlər xaricə iş və ya ailə vizası vədi ilə vətəndaşlardan pul alaraq öhdəliklərini yerinə yetirməyən şəxslərlə bağlı şikayətlərin sayında artım müşahidə olunur.
Məsələ ilə bağlı Murad Muradovla əlaqə saxlamağa çalışdıq, lakin zənglərimizə cavab verilmədi. Qarşı tərəfin mövqeyini dərc etməyə hazırıq.
