Paytaxtın Xətai rayonu, Gəncə prospektində yerləşən 27-ci evin sakinləri yaşadıqları ərazidə yeni binanın tikiləcəyinə görə narahatdırlar. Bu haqda Baku TV reportaj hazırlayıb.
Sakinlərin sözlərinə görə, yaşadıqları evin qarşısında kiçik bir ərazini abadlaşdırıblar və orada bağ salıblar. Onlar illərlə əkdikləri və qulluq etdikləri ağacların kəsiləcəyindən narahatdırlar.
Lakin tikinti şirkəti son günlər ərazidə söküntü işləri aparır. Sakinlərin ehtimallarına görə, ərazidə bina tikiləcək. Onlar iddia edir ki, söküntü zonasından keçən yoldan və pilləkənlərdən daim istifadə olunur ki, onların sökülməsi insanların hərəkətini çətinləşdirəcək.
Məsələ ilə əlaqədar 91 saylı mənzil-kommunal istismar sahəsinin nümayəndəsi rəisinin uzaqda olduğunu, gələ bilməyəcəyini bildirdi.
Xətai Rayon İcra Hakimiyyətindən bu rayonda tikinti işlərinin aparılacağı ilə bağlı yayılan məlumatın yanlış olduğunu bildiriblər. Qurumun şöbə müdiri Pənah İmanov əlavə edib ki, əksinə, Gəncə prospektində abadlıq işlərinin aparılması nəzərdə tutulub.
