Vətəndaşlara xaricdə təhsil almaq imkanları ilə bağlı vədlər verən "Pilgrim Education" şirkətindən şikayətlər artmaqdadır.
Bakuplus.az-a şikayət edən Şüküfova Samirə də şikayətçilər sırasındadır.
O deyir ki, həyat yoldaşı və oğlu ötən ilin yayında bu şirkətə müraciət ediblər. Şirkətdən onlara bildirilib ki, sizi 8-9 ay ərzində 5-6 ölkəyə təhsil və təcrübə proqramına yönəltmək imkanımız var. Bunun üçün onlardan 1200 manat pul alınıb. Şirkətin verdiyi vədlərdən sonra tam arxayın olan ata və oğul evə dönüblər. Amma aylar keçsə də, şirkətdən xəbər çıxmayıb. Bundan sonra onlar dəfələrlə şirkətin nümayəndəsi ilə əlaqə saxlayaraq hansısa xəbər olub-olmaması ilə maraqlanıblar. Hər dəfə onlara bildirilib ki, hələ xoş xəbər yoxdur. Növbəti dəfə əlaqə saxlayanda isə bildiriblər ki, xarici layihələrə 30 yaşlı yetkin şəxsləri qoyub, 18 yaşlı tələbəni qəbul etmirlər: “Elə isə rəsmi səhifələrindəki bakalavrlar, 18, 19 yaşlı gənclərin reklam rolikləri necə yaranır? Və yaxud da belə problemlərin əmələ gəlmə ehtimalı vardısa, onda niyə oğlumdan 1200 pul alıb, onunla müqavilə bağlayırdılar?”
S.Şükürovanın sözlərinə görə, oğlu belə fikirlərin hansı əsasla deyildiyini soruşub, layihələrdən geri qayıdan cavab məktubları ilə şirkətdən mövqeyini əsaslandırmasını tələb edib.
“Bizə bir parça kağız verməyiblər ki, buna görə sizin uşağınızı xaricə göndərə bilmirik. Demək, bir həftədən çoxdur oğlum, 4 gündür mən onlara yazıram, zəng vururam, amma bizimlə görüşmürlər. Bu gün dava-qırğınla məni birinci gün qəbula yazıblar. Deyirəm ki, qarşıda iki iş günü var, sən məni niyə birinci gün qəbula yazırsan? Növbəti dava-qırğından sonra mənə deyiblər ki, sabah gəlin, sizi sənədlərlə tanış edək. Mən kağız-kuğuzu neynirəm? Birincisi, indiyədək bu sənədləri niyə göstərmirdin? Oğlum prosesin əvvəlindən davamlı şəkildə bu mövzu ilə bağlı qarşı tərəfə müraciətlər edib, onlardan layihələrlə bağlı sənədlər istəyib. Amma ona konkret, gərəkli heç bir yazılı məlumat verilməyib. Onlardan bu lahiyələrə müraciət edərkən hazırlamalı olduqları rezüme, CV, “cover letter” kimi bir neçə sənədi davamlı istəməyinə baxmayaraq, məsələ yubadılıb, nəticə əldə olunmayıb. İndi deyirlər ki, gəlin, sizə kağızları göstərək. Sən kağızları niyə indi göstərirsən, o vaxt göstərməmisən? Sən məndən 1200 manat almısan ki, kağız göstərəsən?”, - S.Şükürova bildirib.
Qeyd edək ki, bu şirkətlə bağlı ötən il də xeyli şikayətlər olub. Müxtəlif saytlara açıqlama verən şikayətçilər adıçəkilən şirkətin onlardan pul aldığını, xaricdə təhsillə bağlı vədlər verdiyini, amma vədlərin heç birinə əməl edilmədiyini bildiriblər.
İddialarla bağlı şirkətlə əlaqə saxlamaq mümkün olmayıb, məsul şəxs zənglərə cavab verməyib.
