Xətai rayonu Əliağa Şıxlınski küçəsində baş verən insidentdə yaralananların vəziyyəti məlum olub.
Tibbi Ərazi Bölmələrini İdarəetmə Birliyindən (TƏBİB) Bakuplus.az-ın sorğusuna cavab olaraq bildirilib ki, Respublika Təcili və Təxirəsalınmaz Tibbi Yardım Mərkəzinə 10.12.2024-cü il tarixində saat 20:30 radələrində Xətai rayonu ərazisindən çağırış daxil olub. Çağırış ünvanına təcili tibbi yardım briqadası cəlb olunub:
“Təcili tibbi yardım heyəti tərəfindən 20 yaşlı şəxs (kişi cinsli) döş qəfəsinin kəsilmiş-deşilmiş yarası diaqnozu ilə Sabunçu Tibb Mərkəzinə təxliyə olunub.
Saat 21:00 radələrində isə Xətai rayonu, 35 saylı Polis bölməsindən daxil olan çağırış əsasında təcili tibbi yardım heyəti tərəfindən 21 yaşlı şəxs (kişi cinsli) üst dodağın kəsilmiş-deşilmiş yarası diaqnozu ilə Sabunçu Tibb Mərkəzinə təxliyə olunub.
Sabunçu Tibb Mərkəzinə hospitalizasiya olunan 52 və 20 yaşlı şəxslərə döş qəfəsinin kəsilmiş-deşilmiş yarası diaqnozu təyin olunub və dərhal cərrahi əməliyyata alınıblar.
Müalicələri Cərrahiyyə şöbəsində davam etdirilir. Vəziyyətləri stabil qiymətləndirilir.
Sabunçu Tibb Mərkəzinə müraciət edən 21 yaşlı şəxsə isə dodaq və ağız boşluğunun yarası, əl və biləyin açıq yarası diaqnozu qoyulub.
Zəruri tibbi yardımlar göstərildikdən sonra şəxsin öz istəyilə ambulator müalicə üçün evə buraxılıb. Vəziyyəti stabil qiymətləndirilib”.
Nəzrin Vahid
