Sahibkarların çoxu obyektlərini sığortalamaqda maraqlı deyil. Son günlərdə baş verən yanğınlar səbəbindən sığorta şirkətləri tərəfindən onlara dəyən ziyanın qarşılanmaması da belə deməyə əsas verir. Bu haqda bu gün, 25 noyabr tarixində Bakuplus.az Space TV-yə istinadən məlumat verir.
Azərbaycanda daşınan əmlakın sığortalanması könüllü həyata keçirilir. Məbləği də bir o qədər də böyük deyil. İllik 50 manatdan başlayır. Elə “Taxta bazarı”nda baş verən yanğında zərər görmüş sahibkarlar da əmlaklarını sığortalamayanlar sırasındadırlar. Nəticədə sahibkarlar dövlət tərəfindən heç bir yardım ala bilməyəcəklər.
Sığorta eksperti Ləman Babayeva deyir ki, hazırda ölkə üzrə daşınan əmlakların orta hesabla 5 faizi sığortalı hesab olunur. Əmlakını sığorta etdirməkdə maraqlı olmayan sahibkarlardan fərqli olaraq, sığorta şirkətlərinə edilən müraciətlərin əksəriyyətinə imtina cavab verilir.
“Xüsusən ticarət açıq bazar tipli olan yerlərdə həyata keçirildiyi halda sığorta şirkətləri haqlı mövqedə olurlar. Ona görə ki, bizim əksər sahibkarların sığortalamaqla bağlı sənədləşmələri yerində deyil. Mağazada olan əmlakların qaimələri, sənədləşmələri, onların saxlanma şəraiti hər hansı bir fövqəladə hal yaranarsa, ondan qorunma tədbirləri, ilkin qorunma şərtləri, bunlar yerində olmadığına görə sığorta şirkətləri də haqlı olaraq belə bir riski üzərinə götürmək istəmir”, – deyə ekspert izah edib.
Hazırda yalnız daşınmaz əmlakın sığortalanması məcburidir. Bu öhdəlikdən yayınanlarla bağlı qanunvericilikdə müəyyən edilmiş cərimələr nəzərdə tutulur.
