Yasamal rayonunda növbəti küçə əsaslı təmir olunub. Bu haqda bu gün, 11 yanvar tarixində Bakuplus.az Avtomobil Yolları Dövlət Agentliyinə istinadən xəbər verir.
Yenidənqurma işləri Həsən Məcidov küçəsinin Hüseyn Cavid prospektindən Zahid Xəlilov küçəsinədək olan hissəsində aparılıb.
Uzunluğu 330, ortalama eni isə 12-15 m olan küçədə səki daşları bərpa olunub. Ərazidə köhnə asfalt-beton örtüyünün frezlənməsi və yeni asfalt-beton örtüyünün döşənməsi işləri yerinə yetirilib.
Bundan əlavə, küçə boyunca yeni yağış barmaqlıqları quraşdırılıb, kommunikasiya xətlərinin baxış qapaqları yenisi ilə əvəzlənib.
Sonda yol nişanları quraşdırılıb, üfüqi nişanlanma xətləri çəkilib.
