Bakının Yasamal rayonunda əlilliyi olan 18 yaşadək şəxslər üçün yeni sosial xidmət mərkəzi yaradılacaq. Bu haqda bu gün, 2 fevral tarixində Bakuplus.az Sosial Xidmətlər Agentliyinə istinadən xəbər verir.
Həmin ixtisaslaşdırılmış sosial xidmət mərkəzində 18 yaşadək fiziki məhdudiyyətli şəxslərə sosial reabilitasiya xidmətləri göstəriləcək.
Onlar üçün ünsiyyət, özünəxidmət və sadə əmək vərdişlərinin formalaşması, çatışmazlıqların korreksiyası, eləcə də sosial cəmiyyətə inteqrasiya planlaşdırılır.
Əlavə olaraq, həmin şəxslərin valideynləri üçün fəaliyyət və tədbirlər də həyata keçiriləcək.
Paytaxtın Sabunçu və Nərimanov rayonlarında artıq belə mərkəzlər yaradılıb. Burada 650-dək uşağın reabilitasiyası işləri uğurla başa çatıb.
