Yay aylarında havaların isti keçməsi qidaların daha tez xarab olmasına və qida zəhərlənməsi hallarının artmasına səbəb olur. Xarab olmuş qidaların qəbulu ürəkbulanma, qusma, ishal, qarın ağrısı, halsızlıq və hərarət kimi əlamətlərlə özünü göstərə bilər.
Bakuplus.az mövzu ilə bağlı nutrisioloq və qida mühəndisi Fərid Səfərovun fikirlərini öyrənib.
Mütəxəssisin sözlərinə görə, isti havada ən tez xarab olan məhsullar ət, toyuq, balıq, süd məhsulları, yumurta, mayonezli salatlar və kremli şirniyyatlardır. Bu məhsullar soyuducuda saxlanılmalı, otaq temperaturunda uzun müddət qalmamalıdır.
Fərid Səfərov bildirib ki, qarpız və digər yay meyvələri yaxşı yuyulmalı, kəsildikdən sonra isə soyuducuda saxlanmalıdır. Piknik zamanı qidalar soyuducu çantalarda daşınmalı, çiy və bişmiş məhsullar ayrı saxlanılmalıdır.
Onun sözlərinə görə, qida zəhərlənməsi zamanı ilk növbədə bol maye qəbul edilməli, yüksək hərarət, davamlı qusma, qanlı ishal və ağır susuzlaşma hallarında isə mütləq həkimə müraciət olunmalıdır.
Mütəxəssis vətəndaşlara qidaların saxlanma qaydalarına riayət etməyi, son istifadə tarixini yoxlamağı və küçədə satılan şübhəli qidalardan uzaq durmağı tövsiyə edib.
