Hostellərdən şikayət edənlər çox olsa da, onlara təlabat da var. Çünki bu yerlərdə qiymətlər bir gecəlik 7-20 manat arasında dəyişir. Elə buna görə turistlər arasında da hostellərə maraq göstərənlər var. Bu haqda bu gün, 11 fevral tarixində Baku TV-yə istinadən Bakuplus.az məlumat verir.
Ucuz olmasına baxmayaraq, ölkəmizə gələn qonaqlar arasında hostellərdə qalmaqdan çəkinənlərə də rast gəlmək mümkündür.
Ekspertlərin fikrincə hostellərdə bəzi çatışmazlıqlar var. Məsələn onların bəzilərində təhlükəsizlik qaydaları gözlənilmir. Üstəlik müştərilərə göstərilən xidməti də standartlara uyğun deyil.
Turizm eksperti Ramin Zamanovun sözlərinə görə, bir çoxları podval şəraitindədir və sağlamlıq nöqteyi nəzərdən riskli yerlər sayılır. Bəzi otaqlara sahəsinə uyğun olmayaraq daha çox çarpayılar qoyulur, bu isə sağlamlıq baxımından problemlidir, çünki bir otaqda bir birini tanımayan insanlar yaşayırlar. Bir çox hallarda isə qonaqların qeydiyyatı aparılmır. Bu səbəbdən hər hansı bir xarici vətəndaş barədə lazımi rəmi məlumatı əldə etmək mümkünsüz olur.
Hostel sahibləri isə səslənən ittihamları qəbul etmir, keyfiyyətli xidmət göstərdiklərini deyirlər. Onların iddialarına görə, hostellərdə təmizlənmə mütəmadi olaraq həyata keçirilir, kişi və qadınlar üçün ayrı zonalarda otaqlar təklif olunur. Gecələmək istəyən vətəndaşlardan isə mütləq sənədləri tələb olunur.
Bir sözlə, ölkədə hostellərin sayı kifayət qədər olsa da, göstərilən xidmət ürəkaçan deyil. Bu isə hotellər kimi, hostellərə də nəzarətin gücləndirilməsini zəruri edir.
