Bakının Xəzər rayonunda arvadını döyən kişiyə hökm oxunub. Bu haqda bu gün, 24 iyul tarixində Bakuplus.az Oxu.az-a istinadən məlumat verir.
Xəzər Rayon Məhkəməsinin qərarı ilə o, 9 ay müddətinə azadlıqdan məhrum edilib. Həmçinin ittiham olunan şəxsə yaşadığı evi axşam saat 23:00-dan səhər saat 07:00-dək tərk etməmək, elektron nəzarət vasitəsini gəzdirmək və həmin vasitənin işlək vəziyyətdə saxlanılması üçün ona xidmət etmək, Bakı şəhəri ərazisini tərk etməmək, məhkəmə qərarı olmadan yaşayış yerini dəyişdirməmək, cəzanın icrasına nəzarət edən orqanı iş və ya təhsil yerinin dəyişdirilməsi barədə əvvəlcədən məlumatlandırmaq vəzifələrini yerinə yetirməsi tapşırılıb.
Təqsirləndirilən şəxsin üzərinə kütləvi tədbirlərdə iştirak etməmək vəzifəsi qoyulub. Hökmün icrasına nəzarət təqsirləndirilən şəxsin yaşayış yeri üzrə Bakı şəhər Probasiya İdarəsinə həvalə edilib.
Dindirilmə zamanı məlum olub ki, döyülmə ailə münaqişəsi zəminində baş verib. Kişi özünü təqsirli bilib.
"Birgə nikahımızdan yeddi övladımız var. Nərminin icazə almadan mağazaya getməsi səbəbindən aramızda bir neçə dəfə münaqişə oldu. Hadisə günü saat 13:00 radələrində işdən evə gələn zaman Nərmin evdə olmadı. Bir müddət keçəndən sonra evə gəldi. Bu zaman aramızda mübahisə yarandı. Nərmini rezin boru ilə vurdum", – deyə o, öz davranışını izah edib.
Arvadın sözlərinə görə, əri onu rezin boru ilə vuraraq xəsarət yetirib: "Bu zaman oğlum bizi ayırdı. Təqsirləndirilən şəxslə barışmamışam, ondan şikayətçiyəm".
