Hər il olduğu kimi, bu il də bayramda bəzi məhsulların və xidmətlərin qiymətinin qalxması gözlənilir. Bu haqda bu gün, 15 dekabr tarixində Bakuplus.az Xəzər Xəbər-ə istinadən məlumat verir.
Yeni il bayramı ərəfəsində insanlarının həm ərzaq məhsullarına, həm iaşə sektoruna, həm restoranların xidmətlərinə, müxtəlif əyləncə proqramlarına tələbatlar artır. Buna görə də bu sahədə fəaliyyət göstərən sahibkarlar da qiymətlərini təkliflərinə uyğunlaşdıraraq, müəyyən qədər də bazarın nəbzini tutaraq qiymətləri yüksəldirlər.
Ekspertlər qeyd edirlər ki, qiymət artımları daha çox hotellərdə 100 faiz üzərində baş verir. Restoranlarda 30-50 faiz, bəzən daha yuxarı qiymət artımları müşahidə edilir.
Bəs əsas məsələ sayılan ərzaq məhsullarında qiymət artımı nə qədər ola bilər?
Süfrələrimiz üçün aldığımız məhsullarda da müşahidə edirik ki, təxminən 10-20 faiz ətrafında artımlar müşahidə edilir. Bu da daha çox ət, toyuq qiymətlərində, bayram süfrəsi üçün alınan meyvələrdə, düyüdə özünü göstərir.
“Biz ərzaq məhsullarına nəzər yetirsək, düşünürəm ki, burada qiymət artımı təqribən 20 faizə qədər ola bilər. Bura biz həm meyvə-tərəvəz, həm içki məmulatlarını aid edə bilərik ki, bu istiqamətdə ticarət şəbəkələrində qiymət artımını gözləmək mümkündür. O ki qaldı qeyri-ərzaq məhsullarına, bunlar üzrə qiymət artımı bir qədər də çox ola bilər, hətta 45-50 faizə qədər qiymət artımı ilə bağlı meyillər mümkündür”, – ekspertlər deyirlər.
Ekspertlərin dediyinə görə, qiymət artımı bayrama xas məhsul və xidmətlərdə gözlənilir, müvəqqəti xarakter daşıyacaq və bir neçə günü əhatə edəcək.
