Bakıdakı “Yeni Klinika”da 4 aylıq körpənin həyatı xilas olunub. Bu haqda bu gün, 9 dekabr tarixində Bakuplus.az klinikanın mətbuat katibi Nurida Allahyarovaya istinadən məlumat verir.
Bu, tibb müəssisəsinin Uşaq Reanimasiya və İntensiv terapiya (PİCU) şöbəsinə ilk müraciət olub.
“İshal, yüksək temperatur şikayətləri ilə Uşaq təcili tibbi yardım şöbəsinə təcili tibbi yardım avtomobili ilə gətirilən 4 aylıq körpə müayinə olunduqdan dərhal sonra Uşaq Reanimasiya və İntensiv terapiya (PİCU) şöbəsinə yerləşdirilib.
Ağır septiki vəziyyətdə qəbul edilən xəstədə dərin süstlük, dehidratasiya, qızdırma, ürək döyüntülərinin artması, dəri rənginin solğunluğu müşahidə edilib. İnfeksion laborator göstəriciləri olduqca yüksək olan xəstəyə sepsis, ensefalit diaqnozu qoyularaq aqressiv antibiotik və antiviral terapiya müalicəsinə başlanılıb.
Bundan başqa, xəstədə qaraciyərlə bağlı enzimlərin normadan 40 dəfə çox olduğu, kliniki qıcolma, epileptik status müşahidə edilib.
Bu müddət ərzində xəstəyə ikili sedativ təsirli infuziya icra edilib və qıcolma tutmalarının sonlanması üçün medikal komaya salınaraq süni tənəffüs aparatına qoşulub. 48 saat sonra isə süni tənəffüs aparatından ayrılaraq infuziyaların dozası azaldılıb”, – deyə paylaşımda bildirilir.
Körpə şöbə müdiri Müşviq Ramazanov, uşaq kardioloqu Uzm.Dr. Bəhruz Əliyev, invaziv radioloq Dr. Dursun Həsənov və “Ege Hospital”ın uşaq nevroloqu Uzm.Dr. Ceren Bibinoğlu Amirovun müayinə və müalicəsi ilə ağır vəziyyətdən xilas edilib. Uşaq stasionar şöbəyə yatırıldıqdan sonra ambulator müalicə üçün evə buraxılıb.
[caption id="attachment_122794" align="alignnone" width="640"]
Foto Nurida Allahyarovaya[/caption]
