Bakıda yaşayış binalarının zirzəmilərindəki parklanma yerlərinin qiyməti sürətlə artmaqdadır. Ancaq bu qiymətlər nəyə əsasən və kimlər tərəfindən təyin olunur? Niyə hər yerdə fərqli qiymətə rast gəlirik? Toplanan vəsaitin aqibəti necə olur? Bu kimi suallara APA TV cavab verməyə çalışıb.
Əmlak üzrə ekspertlər deyirlər ki, vətəndaşlardan parklanma üçün yığılan pullar binanı tikən şirkət rəhbəri başda olmaqla, komendantına kimi hamının cibinə gedir. O ki qaldı qiymətlərin yüksək olmasına, ekspertlərin fikrincə, avtomobillər üçün binaların altındakı parklanma yerlərinin kvadratı mənzilin kvadratından daha baha təklif olunur. Elə buna görə də bəzi sakinlər pulu ödəyə bilmədikləri üçün məcburiyyətdən avtomobillərini hərəkət iştirakçılarına mane olduqları ara məhəllələrdə və ya yol kənarlarında park edirlər.
Tikinti şirkətlərinin qarşısında qaraj və parkinqin vacib şərt kimi qoyulmalı olduğunu deyən ekspertlər onu da əlavə edirlər ki, bu gün yaşayış binalarının əksəriyyəti yol kənarında tikilir. Burada isə əksər yerlərdə park yerləri nəzərə alınmayıb. Ona görə də sürücülər avtomobillərini harada və necə gəldi saxlamaqla tıxacların yaranmasına səbəb olurlar. Vəziyyətdən yeganə çıxış yolu isə pulsuz parklanmaların salınmasıdır.
Hüquqşünas Şamil Paşayev deyir ki, Azərbaycan Respublikası Mənzil Məcəlləsinin 35-ci maddəsinə əsasən, binada mənzillərin hissəsi olmayan və birdən artıq sahəyə xidmət göstərmək üçün nəzərdə tutulan obyektlər ümumi paylı mülkiyyət hüququ ilə mülkiyyətçilərə məxsusdur.
“Ümumiyyətlə, vətəndaşlar bilməlidirlər ki, binanın qaraj hissəsi də, ev hissəsi də, binanın idarə edilməsi də onlarındır, bina sakinlərinindir. Bina sakinləri mənzillərin müştərək idarəetmə təşkilatını yaratmalıdırlar. Binanı kimsə tikir, MTK tikəndən sonra komendantı təyin edir. Bu komendant əlavə olaraq vətəndaşlardan rüsum alır, sakinlərdən pul alır. Bunlar qanunsuzdur və əsassızdır. Vətəndaşlar özləri binanı idarə etməlidirlər. Binanın qarajları, parkinqi vətəndaşlarındır, vətəndaşlara məxsus olmalıdır”, - deyə Paşayev vurğulayıb.
[caption id="attachment_90391" align="alignnone" width="640"]
Foto APA[/caption]
