Uşaq pornoqrafiyasını yaymaqda təqsirləndirilən şəxsə hökm oxunub. Bu haqda bu gün, 23 dekabr tarixində Bakuplus.az Qafqazinfo-ya istinadən məlumat verir.
Qaradağ Rayon Məhkəməsinin 14 dekabr tarixli hökmü ilə Elvin Quliyev 9 il 3 ay müddətinə azadlıqdan məhrum edilib.
Paytaxtın Qaradağ rayon sakini, 26 yaşlı Elvin Quliyev Telegram səhifəsində yetkinlik yaşına çatmayan qızın intim görüntülərini yayıb. Bununla bağlı qızın anası polisə müraciət edərək həmin şəxs tərəfindən hədələndiyini, görüntülərinin yayıldığını bildirib.
Qadın deyib ki, Elvini taparaq görüntüləri silməsini xahiş edib, lakin kobud yanaşma və hədə-qorxu ilə üzləşib. Elvin görüntüləri silmək üçün ondan 700 manat pul tələb edib.
Faktla bağlı “Seksual xarakterli hərəkətlərə məcbur etmə, uşaq pornoqrafiyasının dövriyyəsi və hədə-qorxu ilə tələb etmə” maddələri ilə cinayət işi açılıb. Araşdırma zamanı Quliyevin digər şəxslərə qarşı da analoji əməllər törətdiyi məlum olub.
