Bu gün səhər saatlarında Azərbaycanda 5,6 ballıq zəlzələ baş verib. Yeraltı təkanlar paytaxtda da hiss olunub. Təbiət hadisəsi ilə bağlı Daxili İşlər Nazirliyinin (DİN) Bakı şəhər Dövlət Yol Polisi İdarəsi (BŞDYPİ) əhaliyə müraciət edib.
BŞDYPİ bütün hərəkət iştirakçılarını yollarda son dərəcə diqqətli və təmkinli olmağa çağırır.
Baş vermiş zəlzələdən sonra küçə və prospektlərdə hərəkətliliyin daha da artdığını nəzərə alaraq polis əməkdaşları zəruri tədbirləri ərazi üzrə, eləcə də yollarda hərəkətin fasiləsizliyi və təhlükəsizliyini tam gücləndirilmiş qaydada nəzarət altında tənzimləyir.
DİN-dən, həmçinin qeyd olunub ki, zəlzələ ilə əlaqədar xüsusi tapşırıqlar verilib, polis gücləndirilmiş iş rejiminə keçib, xidmətə əlavə qüvvə cəlb edilməklə fasiləsiz xidmət təşkil edilib. Həyacan yaradan xüsusi hal müşahidə edilmir. Bütün informasiyalar diqqətlə izlənilir.
Zəlzələ ilə bağlı Bakı şəhəri və ətraf ərazilərdən hər hansı dağıntı və tələfat barədə Daxili İşlər Nazirliyinə məlumat daxil olmayıb.
