Suraxanı rayonu, Zığ qəsəbə qəbiristanlığında qədim tarixi olan məzarlar mövcuddur. Qəbiristanlıqda diqqətçəkən məqam isə ondan ibarətdir ki, addımbaşı insan skeletlərinin qalıqlarına rast gəlinir. Bu haqda bu gün, 23 sentyabr tarixində Bakuplus.az ATV-yə istinadən məlumat verir.
Ağasadiq Sadiqov Zığda dünyaya gəlib. Onun sözlərinə görə, bu məzarlar babalardan əvvəl də burada olub. Kütləvi şəkildə insanların dəfn olunduğu sərdabələrin kənarları bir müddət öncəyə qədər qapalı idi, lakin daha sonra nəzarətsiz qaldığından giriş hissələri dağıdıldı. İndi azyaşlılar buranı oyun meydançasına, insan qalıqlarını da oyuncağa çeviriblər.
Milli Elmlər Akademiyası Arxeologiya, Etnoqrafiya və Antropologiya İnstitutunun elmi katibi, tarix üzrə fəlsəfə doktoru Akif Quliyev deyir ki, Zığ kəndinin tarixi orta əsrlərə gedib çıxır. Məzarlıqda olan məzarların da tarixi 15-ci əsrdən başlayır. Həmin şəxslər zərdüştlükdə olan dini inanclara əsasən, müvəqqəti qəbrlərə qoyulurdular.
“Bunlara əmanət qəbirlər deyirlər, yəni müvəqqəti qəbirlər, yaxud sərdabələrdir. İnsanlar öləndən sonra torpağa tapşırılmırdı, onları kəfənlə İslam adəti üzrə orada bu sərdabəyə qoyurdular. Dini inanclara görə, insanlar ölməmişdən əvvəl vəsiyyət edirdilər ki, onları Məşhəd, Kərbəla və yaxud Məkkə, Mədinə ətrafında olan qəbiristanlıqlarda dəfn etsinlər, lakin hansısa səbəbdən bu, mümkün olmayıb”, – Quliyev deyib.
Akif Quliyev onu da bildirib ki, sərdabələr tarixi abidədir. Həmin məzarlıqlar mütləq şəkildə qorunub saxlanılmalıdır.
Məsələ ilə bağlı Zığ kənd Bələdiyyəsindən bildirildi ki, lazımi tədbirlər görüləcək. Çəkilişdən sonra insan qalıqları sərdabələrə yığılaraq giriş hissələri qapadılıb.
Mədəniyyət Nazirliyi yanında Mədəni İrsin Qorunması və Bərpası üzrə Dövlət Xidmətindən də bildirildi ki, yaxın günlərdə ərazi nəzarətə götürüləcək.
