Çoxsaylı korrupsiya və dələduzluq əməllərində ittiham edilən iş adamı Şərif Salmanovun Gürcüstanda olduğu deyilir.
Bu barədə qafqazinfo.az-a müraciətində cinayət işi üzrə zərərçəkmiş şəxs qismində tanınmış 34 nəfərdən birinin nümayəndəsi olan vəkil Cavid Rzazadə məlumat verib. O bildirib ki, “Bakı Training mərkəzi”nin rəhbəri olan Ş.Salmanov barəsində Baş Prokuror yanında Korrupsiyaya Qarşı Mübarizə Baş İdarəsinin təqdimatı əsasında 4 aylıq həbs qətimkan tədbiri seçilib.
Təhsil şirkətlərinin rəhbəri kimi tanınan və Cinayət Məcəlləsinin 178.3.2 (Dələduzluq-külli miqdarda ziyan vurmaqla), 308.2 (Vəzifə səlahiyyətlərindən sui-istifadə) və 312.2-ci (Rüşvət vermə) maddələri ilə ittiham elan edilmiş Ş.Salmanovun bundan öncə Gürcüstan istiqamətində ölkəni tərk etməsi məlum olub.
Lakin bu günədək ağır cinayətlərdə ittiham edilən şəxsin tutularaq Azərbaycana gətirilməsi təmin edilməyib.
Vəkil deyib ki, Salmanov Şərif İdris oğlu hazırda Gürcüstan Respublikasının Tiflis və Batumi şəhərlərində fəaliyyət göstərən “Grand Bellagio” adlı kazinoda işləyir, həmin kazinolardan mütəmadi olaraq “TikTok” platformasında efirlər açır, istifadəsində olan mobil telefon nömrəsindən Azərbaycan Respublikası vətəndaşlarına “WhatsApp” tətbiqi vasitəsilə zənglər edib onları hədələyir.
Qeyd edək ki, “İTCC” və “Bakı Training mərkəzi”nin rəhbəri olan Ş.Salmanov tez-tez televiziya proqramlarına ekspert kimi də dəvət edilib.
