Xəzər rayonunun Albalılıq qəsəbəsində post adlanan dayanacaq bərbad vəziyyətdədir. Bu haqda ARB Xəbər reportaj hazırlayıb.
Qoşa daşdan tikilməsinə baxmayaraq, köhnə dayanacağın bütün divarları yararsız vəziyyətdədir, çatlar var. Bu da tikilinin hər an çökə biləcəyini göstərir.
Kəndin əsas yolunun kənarında yerləşən bu dayanacaqdan hər gün onlarla sakin istifadə edir. Bununla belə, heç kim avtobusu nə içəridə, nə də pavilyonun yaxınlığında gözləyə bilmir. Ərazidə bir neçə məktəb var. Ən çox məktəblilər dayanacaqdan istifadə etməli olurlar.
Buzovna bələdiyyəsi də təhlükədən xəbərdar olduqlarını deyirlər və ilkin qiymətləndirmə aparırlar. “Albalılıq yaşayış massivində qəzalı vəziyyətdə olan dayanacaqla bağlı yaxın zamanda məlumat əldə etmişik və həmin yerə baxış keçirilərək müvafiq tədbirlərin görülməsi üçün qərar gəbul etmişik. Yaxın zamanda həmin dayanacağın yenidən restavrasiya olunması ilə bağlı işlər görüləcəkdir.”, - Buzovna Bələdiyyəsinin sədr müavini Təbriz Ağayev bildirib.
