Dekabrın 22-də paytaxtda Maksim Tatarintsevin “MONO” sərgi-layihəsi çərçivəsində “ENT...EXIT” adlı performans keçiriləcək. Bu haqda bu gün, 19 dekabr tarixində Bakuplus.az xəbər verir.
Tamaşada seyrсilər özləri tamaşanın iştirakçıları ola biləcəklər. Bu performans sayəsində izləyicilər unikal sosial təcrübə əldə etmək şansı qazanacaqlar.
Tədbirdə komik, təsirli, absurd, faciəvi vəziyyətlər vurğulanaraq insanların əhvali-ruhiyyənin kəskin dəyişməsinə səbəb olan müxtəlif halların, habelə paradoksal hərəkətlərin nümayişi sərgilənəcək.
Proses insanların bir-biri ilə ünsiyyətinin bütün mərhələlərini – məcburi "qonaqdan", tədricən "qonşuya" çevrilməsini araşdırır.
Sərgi-layihənin rejissoru Konstantin Soldatov, prodüser Leonid Klyots, multimedia operatoru Platon Soldatovdur. Həmçinin performansda Teatr O2 kollektivinin aktyorları – İrina Yakubenko, İskra Tarrant, Pelageya Soldatova, Artyom Portnov, Tatyana Selivyorstova, İvan Teleqin, Tahir Salixov iştirak edirlər.
Performans saat 19:00-da, ARTIM Layihə Məkanında baş tutacaq. Tədbirə giriş sərbəstdir.
