Tural Yusifov 21 avqust 1981-ci ildə Bakıda anadan olub.
Orta təhsilini 281 nömrəli orta məktəbdə alıb. Məktəbdə oxuduğu zaman KVN komandasının kapitanı olub. 1999-cu ildə Bakı Dövlət Universitetinin Tarix fakültəsinə daxil olub. Universitetdə təhsil aldığı müddətdə AZDMIU-nin nəzdində KVN komandası yaradıb və komandanın kapitanı olub.
2003-cü ilin dekabr ayında ANS ÇM radiosunda prodüser kimi işə başlayır. 2 ildən sonra ona aparıcı olmaq təklifi gəlir. Bununla da Tural Yusifov radio prodüser və aparıcı olaraq fəaliyyətini davam etdirir. İlk apardığı radio veriliş dini maarifləndirmə mövzusunda olan "Cümə xütbəsi" idi.
2010-cu ildə Tural Yusifov Media 105.5 Fm radiosunda işə başlayır. Burada onun “AvtoStop” adlı sürücü verilişi yayıma başlayır. Tural Yusifov 2016-cı ildə “Qafqazinfo”ya müsahibəsində belə danışmışdır: “Media FM-ə gedənə kimi 2010-cu ilin martın 21-dən avqustun 10-a kimi rəsmən işsiz qaldım... ANS-də işləyəndə “Svetofor” verilişini aparırdım və qaydaları bilmirdim. O vaxt mənə sual verəndə deyirdim ki, mənlik deyil. Sonra o işsiz qaldığım ərəfədə qarşıma məqsəd qoydum ki, yol hərəkəti qaydalarını yaxşı öyrənəcəm və efir bazarına yeni bir layihə ilə gələcəm”.
2012 ildən “AvtoStop” verilişini Azad Azərbaycan radiosunda (106.3 Fm) aparıb. 2019-cu ildə isə AvtoStop həm də İctimai radio 90 Fm-də və İctimai televiziyanın efirində yayımlanmağa başlayır.
Tural Yusifov “Bomba” milli sosial media, “NETTY” Milli İnternet mükafatlarına layiq görülmüşdür.
Tural eyni zamanda “Avtostop media” production-ın, www.avtostop.tv saytının, “Avtostop Press” jurnalının və Avtostop youtube kanalının təsisçisidir.
