Ali təhsil müəssisələrinə qəbul imtahanının 2-ci mərhələsinin 1-ci cəhdinə qeydiyyat başlayır. Bu haqda bu gün, 15 aprel tarixində Bakuplus.az Dövlət İmtahan Mərkəzinə istinadən xəbər verir.
I-IV ixtisas qrupları üzrə qəbul imtahanının 2-ci mərhələsinin 1-ci cəhdində iştirak etmək istəyən abituriyentlər 15 apreldən 6 may saat 23:59-a qədər DİM-in müvafiq internet səhifəsində qeydiyyatdan keçməlidirlər.
Cari il tədris dili, riyaziyyat və xarici dil fənləri üzrə buraxılış imtahanı vermiş, lakin 1-15 mart tarixlərində aparılan ərizə qəbulunda iştirak etməyən cari ilin məzunların da I, II, III və IV ixtisas qrupları üzrə qəbul imtahanının 2-ci mərhələsində iştirak etmək üçün qeydiyyatdan keçmələrinə imkan yaradılıb.
Bundan əlavə, keçən il buraxılış imtahanı vermiş, lakin 1-15 mart tarixlərində aparılan ərizə qəbulunda iştirak etməyən əvvəlki illərin məzunları I, II, III və IV qruplardan hər hansı birini seçib imtahanın 2-ci mərhələsində iştirak edə bilərlər. Bu halda imtahanın 1-ci mərhələsinin nəticəsi kimi həmin abituriyentlərin keçən il topladıqları bal nəzərə alınacaq.
Ali təhsil müəssisələrinə tələbə qəbulu ilə bağlı subbakalavrların ərizələrinin qəbulu 11 may – 31 iyul tarixlərində internet vasitəsilə aparılacaq.
Tam (11 illik) orta təhsil bazasında orta ixtisas təhsili müəssisələrinə qəbul olmaq üçün müsabiqə şərtini ödəmiş, lakin 1-15 mart tarixlərində keçirilən ərizə qəbulu zamanı “Tam orta təhsil bazasında orta ixtisas təhsili müəssisələrinin müsabiqəsində iştirak etmək istəyirəm” bəndini seçməyən abituriyentlərə yayda kolleclərin ixtisas seçimində iştirak etməyə icazə veriləcək.
