Paytaxtın Nəsimi rayonu ərazisində “Azəriqaz” İstehsalat Birliyinin əməkdaşlarına qarşı zor tətbiq olunması faktı ilə bağlı rayon prokurorluğunda araşdırma aparılıb. Bu haqda bu gün, 20 fevral tarixində Bakuplus.az Apa-ya istinadən xəbər verir.
Hadisə Nəsimi rayonu, İmran Qasımov küçəsində yerləşən mənzillərin birində baş vermişdi. Araşdırma zamanı birliyin əməkdaşları Aqşin Muradlı və Ayxan Abazərlinin sözügedən ünvanda təbii qaz sayğacından gələn borulara baxış keçirərkən həmin mənzildə yaşayan Fuad Məmmədovun sonunculara zor tətbiq etməklə müqavimət göstərməsinə əsaslı şübhələr müəyyən edilib.
Faktla bağlı rayon prokurorluğunda cinayət işi başlanıb. Bununla bağlı Fuad Məmmədov Cinayət Məcəlləsinin 315-ci (hakimiyyət nümayəndəsinə qarşı müqavimət göstərmə və ya zor tətbiq etmə) maddəsi ilə təqsirləndirilən şəxs qismində cəlb edilib. Onun barəsində məhkəmənin qərarı əsasında ev dustaqlığı qətimkan tədbiri seçilib.
İş üzrə istintaq davam edir.
