Paytaxtın Səbail rayonunun Badamdar qəsəbəsi, 3-cü yaşayış massivinin 19-cu küçəsində kanalizasiya şəbəkəsi yoxdur. Sakinlər məcbur qalıb çirkab suları quyulara axıdırlar. İsti havalarda isə həmin quyulardan gələn üfunət onların yaşayışını dözülməz edir. Bu haqda bu gün, 6 avqust tarixində Bakuplus.az ATV-yə istinadən məlumat verir.
“Buradan üzü aşağıya qədər bəlkə min ailə varsa, birinin də kanalizasiyası yoxdur. Pulumuz çatmır ki, biz hər dəfə bu şamboları təmizlədək, çirkab suları çəkdirək”, – deyə sakin şikayət edib.
Sakinlər deyirlər ki, yay ayları olduğundan qazdıqları quyulardan gələn pis qoxu dözülməzdir.
Məsələ ilə bağlı İri Şəhərlərin Birləşmiş Su Təchizatı Xidmətindən bildirildi ki, Badamdar qəsəbəsi, 3-cü yaşayış massivinin əksər küçələrində Dövlət Proqramı Layihələri çərçivəsində yeni kanalizasiya şəbəkə sistemi qurulub və sakinlərin istifadəsinə verilib. Hal-hazırda növbəti layihələrə salınmış digər ərazilər üzrə yeni şəbəkənin yaradılması istiqamətində görüləcək işlərin mərhələli şəkildə həyata keçiriləcəyi nəzərdə tutulur.
Əlavə edildi ki, ərazi üzrə yaxınlıqda olan kanalizasiya şəbəkəsi həmin küçədən 3 km uzaqlıqda və hündür ərazidədir. Qeyd olunan küçədəki evlər isə çökəklikdə tikilib. Səviyyə fərqinin olması səbəbindən burada hər hansı bir yeni kanalizasiya şəbəkəsinin qurulması mümkün deyil. Lakin bütün bu çətinliklərə baxmayaraq, bu problemli ərazilər növbəti Dövlət Proqramları Layihələrinə daxil edilib və yaxın gələcəkdə bu ərazilər üzrə əlverişli, perspektivli, səmərəli layihələrin hazırlanması gözlənilir.
