Bakıdan yola düşən sürət qatarı yolda qalıb. Bu haqda bu gün, 20 fevral tarixində Bakuplus.az Oxu.az-a istinadən xəbər verir.
Bu gün saat 8:45-də paytaxtdan Ağstafaya yola düşən sürət qatarı Ələt stansiyasında dayanıb. Məsələ ilə bağlı “Azərbaycan Dəmir Yolları” QSC-dən açıqlama verilib. Bildirilib ki, bu gün Bakı-Ağstafa istiqamətində hərəkət edən 706 saylı qatar kontakt sistemində yaranmış texniki nasazlığa görə Ələt-Atbulaq sahəsində dayanıb.
“Hazırda texniki problemin aradan qaldırılması istiqamətində zəruri işlər görülür. Sərnişinlərin mənzilbaşına təhlükəsiz çatdırılması üçün əlavə qatar təyin edilib. Artıq əlavə qatar sərnişinləri götürüb və Gəncə istiqamətində hərəkətdədir. Qeyd edək ki, dayanma zamanı sərnişinlərə ödənişsiz çay, qəhvə və şirniyyat paylanılıb. Sərnişinlərə göstərdikləri anlayış üçün təşəkkür edirik”, – deyə qurumdan məlumat verilib.
