Bakıda ailələri tərəfindən imtina edilən bacılar sığınacağa yerləşdiriliblər. Bu haqda bu gün, 29 aprel tarixində Bakuplus.az Oxu.az-a istinadən xəbər verir.
“Təmiz Dünya” Qadınlara Yardım İctimai Birliyinin rəhbəri Mehriban Zeynalovanın sözlərinə görə, ana və nənələri tərəfindən tərk edilən bacılar birliyin sığınacağına gətiriliblər.
“Onlar körpə olarkən ana və ata ayrılıblar. Uşaqlar nənənin himayəsində qalıblar. Bir müddət uşaqları nənə böyütsə də, sonradan o da imtina edib. Uşaqları bir bağçanın qarşısında qoyub gedib. Uşaqlar polis tərəfindən uşaq evinə yerləşdiriliblər. İllər keçib və körpələr böyüyüblər. Uşaq evində olarkən analarını istədiklərini və artıq anaları ilə qalmaq istədiklərini deyiblər. Anaları tapılıb və uşaqlar anaya təhvil veriliblər. Uşaqların ən acı günləri də bundan sonra başlayıb. Anaları hər gün onları döyərək ağır zülmlər edib. Sonunda isə ana da onları atıb. Qızların dediklərinə görə, anaları yenicə evlənib və onlardan əlavə, daha üç uşağı var”, – deyə o, qeyd edib.
Sığınacaq rəhbəri böyük bacının gözünün zəif gördüyünü, onun müayinədən keçirilməsini və hər iki uşağa geyimlə bağlı dəstək göstərilməsini xahiş edib.
