Peşə Təhsili üzrə Dövlət Agentliyi və “Bazarstore” MMC-nin birlikdə təşkil etdiyi satıcı-kassir ixtisası üzrə ödənişsiz kurslara qəbul başlayıb. Qeydiyyat üçün elektron müraciətlər 22 avqust 2021-ci il tarixinədək açıq olacaq.
“BACARIQLI OL” Usta yanında öyrənmə proqramı çərçivəsində həyata keçiriləcək kurslar 15 sentyabr tarixindən başlayacaq və 12 həftə davam edəcək. Təlim proqramına nəzəri və praktiki dərslər daxildir.
Təlimin nəzəri hissəsi Bakıda Turizm və Sosial Xidmətlər üzrə Bakı Dövlət Peşə Təhsil Mərkəzində həftədə bir gün olmaqla təşkil olunacaq.
Praktiki hissə isə Bakıda fəaliyyət göstərən "Bazarstore" MMC-nin mağazalar şəbəkəsində həftənin dörd günü iş şəraitində keçiriləcək.
Təlim müddətində iştirakçılar aylıq yol xərci, fərdi qəza sığortası, həmçinin uniforma və qida ilə təmin olunacaqlar.
Kursu uğurla bitirənlərə Təhsil Nazirliyi tərəfindən təsdiq olunmuş dövlət sertifikatı və həmin mağazalar şəbəkəsində işləmək imkanı veriləcək.
Təlimdə 18 yaşdan yuxarı əmək qabiliyyətli, təlim müddətində heç bir müəssisədə çalışmayan və əyani təhsil almayan şəxslər iştirak edə bilər.
