Bakıda maşınlarını saxlayıb övladlarının dərsdən çıxmasını gözləyən və yaxud onları dərsə gətirən valideynlər mütəmadi olaraq məktəblərin qarşısında sıxlıq yaradırlar. Bu haqda bu gün, 12 oktyabr tarixində Bakuplus.az ARB Xəbər-ə istinadən məlumat verir.
Məktəblərin yaxınlığında olan dar küçələr tamamilə keçilməz olur. İllərdir məktəblərin əksəriyyətinin qarşısında yaşanan bu problem valideynlərin ciddi narazılığına səbəb olur.
Ekspertlər məktəblərin qarşısında dayanma-durmanı qadağan edən nişanların qoyulmalı olduğunu deyirlər. Təhsil ocağının birbaşa qarşısında yox, yaxın ərazidə parklanma yerlərinin ayrılması da vəziyyəti düzəldə bilər.
“Bugünkü ictimai nəqliyyatın bərbad vəziyyətini nəzərə alaraq, vətəndaşlar daha çox fərdi nəqliyyat vasitələrinə və yaxud taksiyə üstünlük verirlər. Belə olan halda, təbii ki, məktəblər qarşısında xüsusi parklanma yerləri olmalıdır. Əgər parklanma yerləri təşkil etmək mümkün deyilsə, o zaman məktəb qarşısında səhər saatlarında övladları məktəbə gətirən valideynlər üçün müəyyən şərait yaradılmalıdır”, – nəqliyyat eksperti Eldəniz Cəfərov deyib.
Məktəbli avtobusların təşkili də vəziyyəti xeyli dəyişə bilər. Amma dövlət məktəblərində bu cür nəqliyyat vasitələri yalnız bir neçə təhsil müəssisəsində mövcuddur. Onlar da valideynlərin şəxsi təşəbbüsü ilə fəaliyyat göstərir.
