“Salaam Cinema Baku”da fotoqraf Coşqun Süleymanovun fərdi sərgisi baş tutacaq. Bu haqda bu gün, 23 noyabr tarixində Bakuplus.az mədəniyyət evinə istinadən xəbər verir.
“2 il öncə qərara gəldim ki, gün ərzində köhnə film kameraları kimi 36 kadrdan artıq şəkil çəkməyim. Beləliklə, şəkilləri lentə alarkən daha diqqətli, daha qərarlı kadrlar çəkməyə başladım. Daha sonra əldə etdiyim kadrlardan sərgi yaratmağa qərar verdim”, - deyə müəllif öz sərgisi haqda bəhs edir.
35 yaşlı Coşqun Süleymanov 10 ildən artıqdır ki, fotoqraflıqla məşğul olur. O, Azərbaycan Fotoqraflar Birliyinin üzvü, "Baku Street Collective”in yaradıcısıdır. Fotoqrafın əsərləri İspaniyanın "Naahboox magazin", Türkiyənin "X Posure" jurnallarında çap olunub. Həmçinin şəkili 2019-cu ildə “35.awards" beynəlxalq fotomüsabiqəsində "Street photo" kateqoriyası üzrə ən yaxşı 50 fotodan biri seçilib.
Sərgi 4-11 dekabr 2022-ci il tarixləri arasında keçiriləcək. Giriş sərbəstdir.
