Bakıda 1932-1933-cü illərin Qolodomorunun 90 illiyinə həsr olunmuş "Mister Cons" filminin nümayişi keçirilib. Bu haqda 25 noyabr tarixində Report məlumat verib.
Nümayişi Ukraynanın Azərbaycandakı səfirliyi təşkil edib. Ukraynanın Azərbaycandakı səfiri Vladislav Kanevskinin tədbirdə bildirdiyi kimi, Qolodomor (insanların aclıqdan kütləvi ölümü) Ukrayna xalqının tarixində faciəli səhifədir.
Məşhur polşalı rejissor Aqneşka Hollandın “Mister Cons” filmi britaniyalı jurnalistin Qolodomor haqqında həqiqət uğrunda apardığı mübarizənin həyəcanlı hekayəsindən bəhs edir.
1933-cü ildə ingilis jurnalisti Qaret Cons Rusiyaya səfər edir. O, Stalindən müsahibə almaq və anasının olduğu yerləri tapmaq üçün Ukraynaya getmək istəyir. Müsahibəni ala bilməsə də, Stalinin Ukraynanı sürüklədiyi və bir neçə milyon insanın həyatına son qoyan humanitar fəlakət olan Qolodomor haqqında yazan ilk qərb müxbiri idi.
