Bakıdakı sərnişin avtobuslarında antisanitariya hökm sürür. Bu haqda bu gün, 27 aprel tarixində Bakuplus.az ATV-yə istinadən xəbər verir.
Belə ki, əsasən, köhnə avtobuslarda müşahidə edilən antisanitariya sakinlərin narazılığına səbəb olur. Bu hal bir çox xəstəliklərə yol aça bilər.
“Dəhşətli vəziyyətdir. Çox çirklidir. Xəstəliklər də belə şeylərdən əmələ gəlir”, – deyə sakinlər şikayət edirlər.
Sürücülər isə bildirirlər ki, bu, kənd yerlərinə gedən avtobuslarda normal haldır.
“Ötən axşam təmizlənən avtobus 1 gün içində görün nə günə düşür. Bakı kəndlərinə gedən avtobuslarda vəziyyət belə olur”, – deyə sürücülərdən biri qeyd edib.
Respublika Gigiyena və Epidemiologiya mərkəzindən bildirildi ki, nəzarət prosesi Yerüstü Nəqliyyat Agentliyi tərəfindən Ədliyyə Nazirliyindən əldə edilən çıxarış əsasında aparılmaılıdr.
AYNA isə qeyd edib ki, antisanitariya aşkar olunduqda qanunamüvafiq addımlar atılır.
“Avtobusların daxili və xarici görünüşünün təmiz və səliqəli olması məsələsi daşıyıcılarla keçirilən görüşlərdə mütəmadi olaraq qaldırılır. Daşıyıcılara avtobusların təmizliyinə nəzarəti gücləndirmək tapşırığı verilir. Eyni zamanda agentliklə daşıyıcı arasında bağlanan müqavilədə avtobusun salon və çöl hssələrinin gündəlik təmizlənməsi tələb olunur”, – deyə qurumdan bildirilib.
Qanuna əsasən, sanitariya norma və qaydalarının, gigiyena normativlərinin pozulmasına görə 70-100 AZN arası cərimə nəzərdə tutulub.
