Bakıda ucuz qiymətə satılan kərə yağları keyfiyyətlidirmi? Bu haqda bu gün, 10 oktyabr tarixində Bakuplus.az ATV-yə istinadən xəbər verir.
Paytaxt bazarlarında və kiçik məhəllə marketlərində nehrə yağı adı altında saxta yağlar satılır. 8 AZN-dən satılan və xalis olmayan yağlara tələbat da az deyil.
“Kərə yağı 8,90-dır. Keyfiyyəti çox qəşəngdir. İstifadə edirsən, kilodan 200 qram suya çıxır görürsən, 750-800 qram təmiz yağ çıxır”, – deyə satıcılar bildirirlər.
Buna baxmayaraq, regionlarda nehrə yağlarının kiloqramının qiyməti 18 AZN-dən başlayır. Bildirilir ki, ucuz qiymətə satılan yağlar əslində heç də keyfiyyətli deyil.
“Təzə südü sərirsən, onun üzündə qaymaq əmələ gəlir. Həmin qaymaq yığılır, altda qalan südə isə “üzsüz süd” deyirlər, o, 94% sudan ibarət olur, lakin ağ görünür. Həmin o suya vaxtı keçmiş marqarinləri, lazımsız olan bütün nə yağlar varsa, qarışdırırlar və qaynadırlar. Daha sonra hemolizator deyilən cihaza tökürlər, həmin yağ və suyu bir birinə qarışdırırlar. Nəticədə qaymaq əmələ gəlir. Həmin o qaymağı yığırlar və yenidən yağ hazırlayırlar”, - deyə Azad istehlakçılar birliyinin sədri Eyyub Huseynov bildirib.
Bu keyfiyyətsiz yağlar insan sağlamlığı üçün təhlükəli hesab olunur və ciddi xəstəliklərə gətirib çıxara bilər. AQTA məsələ ilə bağlı araşdırma aparacağını vurğulayıb.
